قصيدة صبحِ جديد

أطفيت شمعة عيد ميلادي وحيد
والقلب حط همومه بصدري وشال

والحال نفسه لامضى بي كل عيد
كنْه الدهر مابين صبحي والزوال

تناقصو ربعي وانا عمري يزيد
واللي بقى لي من سَعَد شدالرحال

مالي وليف(ن) غير هاجوس القصيد
ونور القمر وسهيل مع نجم الشمال

الصبح عيّا يقترِب دومه بعيد
والليل ذا ياثقل دمه كيف طال

ياشينَها ذيك الهدايا وش تفيد
لافادني عطر(ن) ولاساعه وشال

وياصبرَها روحي على الهم الشديد
ماظنتي تقوى على حملي جبال

لي خافق(ن) عيّا به الحظ العنيد
ماغير شوفك يمنَعَه ذل السؤال

وإلا هديه وكرت (ميلادك سعيد)
ماتغني الخفّاق عن ذاك الوصال

إما يطفّي شمعتي صبح(ن) جديد
أو ينكتب لي هاذي الليله زوال