قصيدة بــخــور

بتدينا ياقلم والله يعين
وياعسى مايبتدي منّا قصور

زخرِفْ العنوان بَعْدَه نقطتين
وان تثاقل وَصْفَها خلك صبور

كان ودي اختصر في كلمتين
قصةٍ ماتكتفي منها سطور

المعارك في زمنّا ساحتين
حرب غزّه و ام عطرين وبخور

مقبلَه والنور في ذاك الجبين
كن ماقبْلَه خُلق فالكون نور

تسلب الانظار بالطرف اليمين
وفي يسار العين حفّارة قبور

والقمر مابين خدّيها يبين
والجدايل ليل وآنا به سهور

خصْرَها عايش يبا جرعة حنين
ورِدْفَها طايش ربى بين القصور

ناعمه كنْها طفل عمره سنين
حازمه فيها عقل يحكم دهور

قرّبَتْ بشفاتها صوب الجبين
إرتَعَش قلبي واحاسيسي تثور

ماعرفت السر هي مخلوق طين؟
أو ملاكٍ طاح ولّا بنت حور

إستفَقْت وصابني ذاك اليقين
والاّ هيْ ماهي أساساً بالحضور

أثرها الا حلم وابليس اللعين
جرّني صوبه على وقت السحور

قمت صليت الفجر في ركعتين
.واستعذت بخالقي من كل شور

اشغلتني وجيت بكتب كلمتين
ويظهر اني ضعت مابين السطور