قصيدة روح الغريب

كان روحك يابها للحب عيب
مرحبا بالعيب دامه يابها

ياحبيبٍ مارحم حالة حبيب
ياقصيده تعّبت كتّابها

كم قلبٍ ناظر عيونك صويب
صابتَه عينك وهو ماصابها

خل عنْك البعد واقرب للقريب
متّع النفس بوصال أحبابها

ماشبعت من القطاعه والمغيب؟
ماشبع دمعٍ ملا جلبابها؟

نادِتِكْ عيني ولاشافت مجيب
لين بح الصوت ماحد جابها

والله اني عايش بروح الغريب
ووالله ان الموت دق أبوابها

ووالله ان العين من بعدك تشيب
ماتلاقن من رَحَلْت اهدابها

الليالي مَعْك ماكانت تهيب
وارتكز من رحت عني نابها

دلّني ان كنت ماتشفي طبيب
ينظر جروح الهوى واسبابها

المحبه مابها من علم غيب
ياتحب أو سد عنّك بابها

تدري وش هو الموت في عين الغريب؟
خوف عينه ماتشوف أحبابها
قم بالدخول لتعلق.